Azərbaycan Dövlət Təhlükəsizliyi Xidməti (DTX) Azərbaycanda yəhudi icmasını hədəf alan terror-təxribat planının qarşısını alıb.
Megaxeber.az-ın DTX-yə istinadən verdiyi məlumata görə, plan İran İslam İnqilabı Keşikçiləri Korpusu (SEPAH) ilə əlaqəli şəxslər tərəfindən hazırlanıb. Hədəflər arasında Aşkenazi sinaqoqu və yəhudi icmasının tanınmış nümayəndələrindən biri yer alıb. Eyni zamanda İsrailin Azərbaycandakı səfirliyi də mümkün hədəflər arasında olub.
DTX bildirir ki, ölkə ərazisinə keçirilməyə cəhd edilən üç partlayıcı qurğunun aşkarlanaraq zərərsizləşdirilməsi ilə terror planının həyata keçirilməsinin qarşısı alınıb.
Rəsmi qurumlar vurğulayır ki, Azərbaycanın müxtəlif din və millətlərin nümayəndələrinin sülh və təhlükəsizlik şəraitində yaşadığı tolerant ölkə olduğunu göstərməkdədir. Yəhudi icmasına yönələn bu cəhdlər qəbuledilməz hesab olunur və dövlət tərəfindən onların təhlükəsizliyi tam təmin edilir.
“DTX-nin vaxtında tədbirləri sayəsində Azərbaycanda yəhudi icmasına qarşı yönələn bu təhlükə neytrallaşdırıldı. Belə terror cəhdləri həm ölkəmizə, həm də regionun sabitliyinə açıq təhdiddir. Azərbaycan öz vətəndaşlarının, o cümlədən yəhudi icmasının təhlükəsizliyini qorumaqda qətiyyətlidir,” – deyə jurnalist David İsa bildirib.
