Ukraynada növbəti terror hadisəsi baş verib. Lvov şəhərində törədilən partlayış nəticəsində bir nəfər həyatını itirib, 25 nəfər isə müxtəlif dərəcəli bədən xəsarətləri alıb.
Ukraynanın daxili işlər naziri İqor Klimenko Lvovda baş verən və bir nəfərin ölümünə, 25 nəfərin yaralanmasına səbəb olan terror aktında şübhəli bilinən şəxsin həbs olunduğunu açıqlayıb.
Megaxeber.az xəbər verir ki, bu barədə Ukrayna Prezidenti Volodimir Zelenski özünün Telegram kanalında məlumat verib.
Prezident paylaşımında bildirib:
“İstintaq bütün zəruri resurslarla təmin edilib. Saxlanılan şəxslə bağlı lazımi prosedur addımları davam edir. Daxili İşlər Nazirliyi sizi bütün zəruri detallar barədə məlumatlandıracaq”, – deyə o, şübhəlinin kimliyini açıqlamadan bildirib.
Hazırda hadisə yerində əməliyyat-istintaq tədbirləri davam etdirilir. Yaralılar xəstəxanalara yerləşdirilib və onlara tibbi yardım göstərilir. Rəsmi qurumlar terror aktının motivləri və mümkün əlaqələri ilə bağlı araşdırmaların aparıldığını bildirir.
Qeyd edək ki, Lvov Ukraynanın qərbində yerləşən və strateji əhəmiyyətə malik şəhərlərdən biridir. Son dövrlər ölkədə təhlükəsizlik tədbirləri gücləndirilsə də, baş verən hadisə bir daha göstərir ki, terror təhlükəsi tam aradan qalxmayıb.
