İsrail Müdafiə Nazirliyi ölkənin Livan, Suriya və Qəzza zolağında mövcud olan təhlükəsizlik zonalarından geri çəkilmək niyyətində olmadığını açıqlayıb.
Məsələ ilə bağlı danışan İsrail müdafiə naziri İsrael Katz bildirib ki, ölkənin təhlükəsizlik strategiyası “aydın və qəti” prinsiplərə əsaslanır və İsrail bütün yaxın və uzaq təhdidlərə qarşı aktiv müdafiə siyasətini davam etdirəcək.
Nazirin sözlərinə görə, hazırkı regional vəziyyət İsrailin təhlükəsizlik mövqeyini gücləndirməsini zəruri edir:
“Bizim təhlükəsizlik konsepsiyamız aydındır: yaxın və uzaq təhdidlərə qarşı fəaliyyət göstəririk və geri addım atmaq niyyətində deyilik. Məqsədimiz qələbədir. Hazırda çox şey risk altındadır və əldə etdiyimiz təhlükəsizlik nailiyyətlərinə zərər verəcək addımlardan uzaq duracağıq,” – deyə Katz bildirib.
O həmçinin İsrailin İranın rəhbərlik etdiyi “şiə oxu” və Müsəlman Qardaşları ilə əlaqələndirilən “sünni oxu” kimi regional təhdidlərə qarşı mübarizə siyasətini davam etdirəcəyini vurğulayıb.
Qeyd edək ki, bu açıqlama İsrailin Livan, Suriya və Qəzza istiqamətində təhlükəsizlik strategiyasını dəyişməyəcəyi mesajı kimi qiymətləndirilir.
